Somalia: Madax aadday dalka Turkiga
-
- Posted On 22-02-2016, 04:43PM
MUQDISHU- Madaxweynaha Somalia iyo wafdi uu hogaaminayo ayaa maanta u dhoofay dalka Turkiga gaar ahaan Istambul, waxayna ka qayb galayaan shir looga hadlay arrimaha Somalia gaar ahaan hiigsiga 2016.
Wafdiga Xasan Sheekh Maxamud, waxaa kamid ahaa Xildhibaano, Wasiirro iyo saraakiil kale, waxaana kasii horeeyay Ra'isal wasaare Sharmake iyo mas'uuliyiin lasocota. Dhinaca kale, waxaan dalkaasi u amba-baxay madaxweynaha Jubbaland Axmed Madoobe, halka madaxda maamullada Galmudug iyo Koonfur Galbeed lasoo sheegayo inay dhawaan tagi doonaan.
Shirkan ayaa lafilayaa inuu barri furmo, waxaana diiradda lagu saari doonaa arrimaha doorashada Somalia, balse waxaa shaki lagalinayaa Madaxweynaha Puntland Cabdiwali Maxamed Cali Gaas oo hadda kusugan xarunta Ethopia.
Kulanka Istambuul ayaa dabasocda shirarkii ka dhacay Somalia ee looga hadlay habraaca doorashada waddanka, waxaana natiijadii kasoo baxday qadacday Puntland oo sheegtay inaysan ku qanacsanayn in dib loogu laabto nidaamka wax ku qaybsiga beelaha.
Ilaa hadda majirto go'aan rasmi ah oo Puntland kasoo baxay kaasoo kusaabsan shirka Istambuul.
GAROWEONLINE
