Somalia: Qaraxyo ka dhacey agagaarka Hotel SYL Muqdishu
-
- Posted On 26-02-2016, 09:20PM
MUQDISHU, Somalia- Qarax xoogan ayaa ka dhacey goor dhoweyd agagaarka Hotel SYL ee ku yaal nawaaxiga Villa Somalia iyadoo kadib la maqley rasaas tiro badan oo halkaas la isku waydaarsdey.
Goobtaan ayaa waxa muddo 40 daqiiqo kadib laga maqley qarax kale oo waaweyn, waxaana wararku sidoo kale sheegayaan in goobta la yiraahdo Beerta Nabadda oo goobtaasi ka ag dhow la beegsadey.
Beerta Nabada ayaa waxaa galabta Jimca ahayd isugu yimaada qoysaska iyagoo halkaas carruurta ka helaan qalab lagu cayaarsiiyo.
Lama oga khasaaraha rasmiga balse wararka ayaa xusaya in weeraradan ahaayeen kuwa xoogan oo magaalada Muqdishu gabi ahaan laga maqley.
Al-shabaab ayaa si hore dhac ah u sheegatey mas'uuliyadda falkan kadib markii ay taleefon ugu sheegeen BBC islamarkaana soo dhigeen barahooda bulshada.
Weerarkan ayaa yimi xilli shalay 25 Febrayo, hoobiyaal lagu weeraray madaxtooyada Somalia iyadoo ay dhinteen shan ruux, waxaana falkaasi dowladda Somalia sheegtay inay u soo qabqabatay dad gaaraya 20 ruux iyo gaawari.
Wararka la xiriira qaraxyadan iyo khasaaraha kala soco Garowe Online.
GAROWEONLINE
