Soomaaliya iyo Qatar oo Xoojiyay Xiriirka Difaaca Kadib Khilaafka Imaaraadka

Doha — Soomaaliya iyo Dowladda Qatar ayaa kala saxiixday heshiis iskaashi difaac oo lagu xoojinayo xiriirka milatari iyo ballaarinta wada-shaqeynta amniga ee u dhexeeya labada dal.

Heshiiska ayaa waxaa kala saxiixday Wasiirka Gaashaandhigga Soomaaliya, Axmed Macallin Fiqi, iyo Wasiirka Difaaca Qatar, Sheekh Sacuud bin Cabdiraxmaan bin Xasan Al Thani, waxaana munaasabadda saxiixa lagu qabtay xarunta Shirka Caalamiga ah ee Difaaca Badda ee Doha (DIMDEX), sida ay sheegtay wakaaladda wararka dowladda Soomaaliya ee SONNA.

SONNA ayaa sheegtay in heshiiskan uu diiradda saarayo xoojinta iskaashiga difaac, horumarinta hannaanada isku-dubaridka amniga, iyo taageeridda dadaallada wadajirka ah ee lagu xaqiijinayo amniga iyo xasilloonida heer gobol iyo mid caalami ah.

Wakaaladda ayaa intaas ku dartay in heshiisku uu ka tarjumayo iskaashi istiraatiiji ah oo sii kobcaya oo u dhexeeya Jamhuuriyadda Federaalka Soomaaliya iyo Dowladda Qatar, iyadoo la xusay dano wadaag ah oo ku aaddan ballaarinta iskaashiga dhinacyada difaaca iyo amniga.

Horraantii Isniinta, Amiirka Qatar, Sheekh Tamiim bin Xamad Al Thani, ayaa si rasmi ah u daah-furay daabacaaddii sagaalaad ee DIMDEX, oo lagu qabtay Xarunta Shirarka Qaranka Qatar ee magaalada Doha.

Bandhigga oo soconaya afar maalmood ayaa isu keenay in ka badan 200 shirkadood oo Qatari iyo caalami ah, kuwaas oo ka hawlgala dhinacyada difaaca badda, dhulka iyo cirka. Sidoo kale, DIMDEX ayaa sanadkan soo jiitay ka-qaybgal heer sare ah, iyadoo in ka badan 110 wafdi oo rasmi ah ay ka kala yimaadeen dalal kala duwan oo caalamka ah.

GAROWE ONLINE