Soomaaliya oo kamid ah dalal saxiixay bayaan dhan ah China
-
WARIYAHA WASHINGTON GAROWE ONLINE
- Posted On 01-11-2022, 03:11AM
WASHINGTON, United States - 50-ka waddan ayaa walaac ka muujiyay xaaladda xuquuqul insaanka ee gobolka Xinjiang ee Shiinaha waxayna ku booriyeen Beijing inay ku dhaqanto talooyinka warbixinta Qaramada Midoobay ee ku saabsan xadgudubyada xuquuqda aadanaha ee ka dhanka ah bulshada Muslimiinta ah ee Uyghurs.
Saxiixayaasha baaqan caalamia ah waxaa ka mid ahaa Mareykanka, Ingiriiska, Japan, Faransiiska, Jarmalka, Australia, Israel, Turkiga, Guatemala iyo xitaa Soomaaliya.
Isagoo cambaareynaya "dambiyada ka dhanka ah bini'aadantinimada" ee Shiinaha ee gobolka Xinjiang, 50-kan waddan ayaa saxeexay bayaan Isniintii waxayna ku baaqeen ''fiirin degdeg ah'' oo ka socda Qaramada Midoobay oo ka dhan ah xadgudubyada xuquuqda aadanaha ee Shiinaha ee ka dhanka ah Uyghurs.
War-saxaaafdeedka oo ay ku saxiixnaayeen inta badan dalalka reer galbeedka ayaa u qornaa sidan: “Waxaan aad uga walaacsanahay xaaladda xuquuqul insaanka ee Jamhuuriyadda Shacbiga Shiinaha, gaar ahaan xad-gudubyada ka dhanka ah xuquuqul insaanka ee Uyghurs iyo Muslimiinta kale ee laga tirada badan yahay ee ku nool Xinjiang”.
Dhaleeceynta ayaa inta badan astaan u ah ka dib markii mar hore la isku dayay in dood arrintan ku saabsan lagu qasbo cod loo qaaday Golaha Xuquuqul Insaanka ee Qaramada Midoobay.
Wadamadu waxay ku booriyeen Shiinaha inuu si buuxda u fuliyo talooyinka warbixinta Qaramada Midoobay iyo in la sii daayo dhammaan kuwa "xorriyada looga qaaday".
Bishii Ogosto, Xafiiska Wakiilka Sare ee Qaramada Midoobay ee Xuquuqda Aadanaha (OHCHR) ayaa soo saaray warbixin si weyn loo sugayay oo ku saabsan xadgudubyada xuquuqda aadanaha ee gobolka Xinjiang ee galbeedka Shiinaha.
Natiijooyinka warbixinta ayaa lagu soo gabagabeeyay in marka la eego siyaasadaheeda ka hortagga argagixisada iyo xagjirnimada, Shiinuhu uu ku kacayo xad-gudubyo halis ah oo xuquuqda aadanaha ah. Xukuumadda Beijing waxay si adag u diidey eedeymahan oo ay ku sifeysay in ay salka ku haayaan "arrimo iyo dano siyaasadeed".
GAROWE ONLINE
