Soomaaliya oo rajeynaysa in 2023-ka laga cafiyo deynta
-
WARIYAHA MUQDISHO GAROWE ONLINE
- Posted On 22-06-2022, 04:55AM
MUQDISHO, Soomaaliya – Wasiirka qorsheynta xukumadda xilgaarsiinta ah Jamaal Maxamed Xasan oo la hadlay Garowe Online Twitter Space ayaa sheegay in uu rajo wayn ka qabo in Soomaaliya sanadka 2023 ay soo dhamaystiri toonta barnaamijta dayn cafinta oo sanadihii la soo dhaafay wadanku soo waday.
Wasiirka ayaa sheegay in xilligaas Soomaaliya aysan si buuxda u dhamaystiri doonin oo ay jiri doonaan lacag ku hari doonta Soomaaliya taas oo baahan in la sii amba qaado.
"Waxaan ku rajo weynahay in 2023 lasoo dhameystiro barnaamijka deyn cafinta. Laakiin ma noqon doonto 100% waxaa nagu hari doonta 500 milyan” ayuu yiri wasiir Jamaal Maxamed Xasan.
Wasiirka ayaa sheegay in Soomaaliya ay buuxisay dhamaan shuruudihii ay hordhigeen hay’adaha caalamiga ah ee ka shaqeeya dhaqaalaha sida bangida aduunta iyo lacagta aduunka ee IMF.
“Shuruudihii ugu waawaynaa waa ka soo gudubnay kuwa yar oo ku xiran baarlamaanka maahee, marka waxaan rajaynaynaa in sanadka dambe aan ku guulaysa doono” ayuu hoosta ka xariiqay wasiirka.
Hay'adda Lacagta Adduunka ee IMF ayaa sheegtay in Soomaaliya ka soo gudubtay shuruudo waawayn oo muhiim u ah deyn cafinta ee wadamada fakhriga ah. Soomaaliya ayaa noqotay wadankii 37-aad ee caalamka ee gaara heerkaan dayn cafinta.
Inkastoo qorshaha deyn cafinta ay tahay mid soo socotay oo ay soo bilaabeen xukuumadihii hore, haddana dowladda hadda jirta waxaa ay sheegtay in arrintan ay ku timid dedaal xukumadihii kala dambeeyay galiyeen hanaanka dayn cafinta dalka
Hey'adda lacagta adduunka ayaa sheegtay in Soomaaliya ay dedaal u gashay sidii ay usoo gaari lahayd halkan iyada oo ku boorisay hay’adaha maaliyada dalka in ay sameeyeen daahfurnaan dhamaan talaabooyinka la qaadayo.
GAROWE ONLINE
