Su'aallo kasoo noqotey dadka loo xiray is-qarxinta Jaalle Siyaad

Taliyihii Akadeemiyada Jaalle Siyaad, ayaa shalay lagu arkay xarunta; ma uusan xirneyn, sida ay ilo-wareedyadu sheegeen.

MUQDISHO, Soomaaliya - Wasiir ku xigeenka Gaashaandhigga Soomaaliya Cabdifitaax Qaasim oo la hadlay Baarlamaanka ayaa sheegay in 14 isugu jira saraakiil iyo askar loo xiray qaraxii ismiidaaminta ahaa ee 24-kii bishan July ka dhacday Kuuliyadda Jaalle Siyaad.

Dadka la xiray waxaa ka mid ah taliyihii akadeemiyadda, sida uu yiri. Balse Taliyihii Akadeemiyada Jaalle Siyaad, ayaa shalay lagu arkay xarunta; ma uusan xirneyn, sida ay ilo-wareedyadu sheegeen.

Guddoomiyaha Golaha Shacabka ee Baarlamaanka Soomaaliya ayaa si kulul u cambaareeyay qaraxaas oo uu ku tilmaamay "fal fulaynimo, arxan la’aan iyo diin la’aan ahaa".

Weerarkan dhacay Isniintii lasoo dhaafay ayaa waxaa lala beegsaday xeradan ciidan, waxaana uu galaaftay nolosha 25 askari, in ka badan 70 kalena ay ku dhaawacmeen.

Sheekh Aadan Maxamed Nuur, oo loo yaqaano Aadan Madoobe oo muuqaal gaar ah soo duubay, ayaa sheegay in uu tuhunsan yahay in “khiyaannooleyaal” ay fududeeyeen qaraxaas.

"Waan ogahay in saraakiisha ay ku jiraan dad wanaagsan, dadaal badan, sharaf leh, laakiin khaa'inul waddan ayaa fududeeyay arrintan. Aad ayaan uga shakisanahay. Waa wax aan loo dulqaadan karin,” ayuu ku yiri.

Ururka Al-Shabaab ee gacan-saarka la leh shabakadda argagixisada ah ee Al-Qaacida ayaa sheegtay mas’uuliyadda weerarka. War qoraal ah oo ay Al-Shabaab ku soo qoreen barta Telegram-ka ayay ku sheegeen in mid ka mid ah raggii is qarxiyay uu fuliyay weerarka.

GAROWE ONLINE