TV-ga dowlada Itoobiya oo Xasan Sheekh la xiriiriyey TPLF

Isla warbixinta ayaa lagu sheegay in TPLF iyo jabhadda Shane ay xiriir la leeyihiin kooxda Al-Shabaab.

MUQDISHO , Soomaaliya- Faallo ka baxday taleefishinka dowladda Itoobiya qeybtiisa Ingiriiska, lana soo dhigay bogga TV-ga ee calaamadda buluuga leh ayaa looga hadlay xiriirka Soomaaliya iyo Itoobiya. 

Inkasta oo faallada TV-ga aanan lagu soo xigan mas’uul dowladeed oo si toos ah uga hadlaya, haddane waxa uu si toos ah u sheegay in xubno sarsare oo ka tirsan dowladda Xasan Sheekh ay xiriir wadashaqayn la leeyihiin kooxda TPLF oo ay Itoobiya u taqaano koox argagixiso ah.

Isla warbixinta ayaa lagu sheegay in TPLF iyo jabhadda Shane ay xiriir la leeyihiin kooxda Alshabaab, islamarkaasna ay si wadajir ah usoo abaabuleen duulaankii bilo ka hor lagu qaaday dowlad deegaanka Itoobiya.

Halkaasi kuma ekaan warbixinta TV-ga, waxaa sidoo kale lagu sheegay in Xasan Sheekh Maxamuud uu u janjeero dhanka TPLF, xiriirkaasna uu biloowday xilligii uu ururkani maamuli jirey Itoobiya, Xasana uu madaxweyne ahaa markiisii ugu horeysay.

Taleefishinka oo soo xiganaya hadalo uu Raisulwasaaraha Itoobiya Dr Abiy Axmed uu ka jeediyay xafladdii caleemo saarka Xasan Sheekh ayaa sheegay in dowladda Itoobiya ay muujisay sida ay diyaarka ugu tahay in ay wadashaqayn heersare ah iyo xiriir wanaagsan la yeelato dowladda Soomaaliya, balse weli Madaxweyne Xasan Sheekh aanan laga hayn arrinkaasi.

TV-ga ayaa ugu baaqay madaxweynaha in uu muujiyo sida ay uga go'antahay wanaajinta xiriirka labada dal, dalkiisana uu ka mamnuuco "kooxaha xagjirka ah".

Wuxuu Tvga si toos ah u sheegay in madaxweyne Xasan Sheekh uu qarka u saaran-yahay in uu lumiyo xiriirka Itoobiya "haddii uu muujin waayo tallaabooyin dhanka wanaagsan loo qaaday".

La dagaalanka Al-Shabaab ayuu TV-ga sheegay "in uu yahay arrin dan u ah Soomaaliya, sidoo kalena guud ahaan gobolka, dowladda cusubna ay tahay in ay arrintaasi ka dhiidhiso".

Itoobiya ayaa ah dalka dariska ah, ama ka mid ah kuwa xiriirka dhow la leh Soomaaliya oo uusan illaa hadda booqan madaxweynaha oo safaro is daba-joog ah ku bixiyay dalal badan.

Dadka dublamaasiyadda u dhuun duleela ayaa qaba in hadalada dublamaasiyadeed mararka qaar la isu mariyo saxaafadda, marka ay warbaahin dowladeed tahayna uu hadalka kaba sii xoog badanyahay. Waxay qabaan in warkani yahay aragtida rasmiga ah ee dowladda Itoobiya ka qabto dowladda Xasan Sheekh.

GO ayaa fahamsan in xubno sarsare gaar ahaan dhanka amniga intii muddo ahba farta lagu godayay in ay xiriir toos ah la leeyihiin TPLF.

TPLF qudheeda ayaa u dabaal degtay markii xilka loo doortay Xasan Sheekh Maxamuud, sheegtayna in ay wada shaqayn diyaar u tahay.

Lama oga halka ay la isaga xiri karo TPLF, Shane, Alshabaab iyo dowladda federaalka ee Soomaaliya, kuwaas oo hadda dowladda Itoobiya ay u muuqato in ay hal qaanad ku rideyso.

Taliyihii hore ee NISA oo Aad ugu dhowaa dowladda Abiy Axmed ee Itoobiya, Fahad Yaasiin oo wareysi bixiyay markii uu xilka ka tagay ayaa xubno sarsare oo dowladda Xasan ka tirsan ku eedeeyay in ay la shaqeeyaan Alshabaab. Balse wax caddeyn ah arrinkaasi looma hayo oo eedeynta dhaafsiisan.

Si kastaba ha ahaatee, xiriirka labada dal ayaa u muuqda in uu marayo meeshii ugu hoseeysay, iyada oo weli dowladda Soomaaliya Aysan war rasmi ah kasoo saarin sida uu xaalka yahay.

GAROWE ONLINE