Wasiir Cabdirashiid Janan oo doon ku tegay magaalada Kismaayo
-
WARIYAHA KISMAAYO GAROWE ONLINE
- Posted On 31-01-2020, 01:04PM
KISMAAYO, Jubaland - Wasiirka amniga Jubaland, Cabdirashiid Xasan Cabdinuur, ayaa gaaray Kismaayo, sidda uu baahiyey Talafishinka ku hadla afka dowlad goboleedkaas.
Janan oo ay la socdeen xubno dhowr ah ayaa lagu waramay in ay doon ka dejisay dekada magaalo madaxda ku meel gaarka maamulkaas.
Illo wareedyo ayaa u sheegay warsidaha Garowe Online in loo galbiyey dhanka Madaxtooyadda, halkaasoo qorshuhu yahay in uu kula hadlo warbaahinta madaxa banaan.
28-kii Janaayo, 2020, booliska Soomaaliya ayaa shaaciyey in Janan uu ka baxsaday xabsi ku yaala nawaaxiga xarunta hay'adda nabad-sugida iyo sirdonka Qaranka NISA.
Bishii August, 2019, Janan ayaa laga qabtay garoonka diyaaradaha Muqdisho, isagoo ka yimid Doolow kuna soo jeeday Addis Ababa, caasimadda dalka Itoobiya.
Jubaland oo xarigiisa ku tilmaamtay "mid sharci darro ah iyo afduub" ayaa dalbatay in sidda ugu dhaqsiyaha badan uu xorriyadiisa dib ugu helo.
Bishii October, 2019 ayuu kasoo muuqday Maxkamadda gobolka Banaadir, taasoo sharciyeysay in xabsiga lagu sii hayo.
Sikastaba ha ahaatee, qabashadda Janan ayaa holac kusii shiday khilaaf u dhaxeeyay dowladda Soomaaliya iyo Jubaland oo ka dhashay doorashadii madaxweyne Axmed Madoobe.
GAROWE ONLINE
