Xamse Cabdi Barre oo helay kalsoonida baarlamaanka 11aad

Xamza ayaa noqonayaa Ra’iisul Wasaarihii 21-aad ee Jamhuuriyadda Soomaaliya wuxuuna badalayaa Maxamed Xuseen Rooble.

MUQDISHO, Soomaaliya - Xildhibaanada golaha shacabka baarlamaanka 11aad ee Soomaaliya ayaa Sabtida maanta ah waxay si aqlabiyad leh u meelmariyeen ra'iisul wasaare Xamse Cabdi Barre.

Sidda uu sheegay guddoonka Aqalka Hoose, 220 mudane oo fadhiga soo xaadirtey ayaa qaab gacan taag ah ku ogolaatay magacaabida Xamse. Ma jiro xildhibaan diiday ama ka aamusay.

Kulankan maanta qabsoomay oo la filayey inay Arbacadii yeeshaan Xildhibaanada baarlamaanka ayaa dib ugu dhacay maadaama ay dalka ka maqnaayeen madaxweyne Xasan Sheekh iyo Guddoomiye Aadan Madoobe.

Mr Barre ayaa maalmihii tegay kulamo gaar gaar ah la yeelanayey xildhibaannada baarlamaanka, isagoo ka codsaday inay kalsoonidooda siiyaan, wuxuuna heystaa ballanqaadyo xooggan.

Xildhibaano badan ayaa sidoo kale rajo wanaagsan ka qaba inay ka mid noqdaan golaha wasiirada, taasi oo u sahleysa Xamza inuu helo codka kalsoonida.

Caqabadda ugu weyn ee Xamza hortaalla ayaa imaneysa marka uu soo dhiso golaha wasiirada, markaasi oo xildhibaano badan oo golaha iska waaya la filayo inay caqabad ku noqdaan ansixinta golaha wasiirada.

Xamza ayaa noqonayaa Ra’iisul Wasaarihii 21-aad ee Jamhuuriyadda Soomaaliya wuxuuna badalayaa Maxamed Xuseen Rooble oo ah wasiirka koowaad ee xukuumadda xilgaarsiinta federaalka ah ee Soomaaliya.

GAROWE ONLINE