Xarun ay lahayd Al-Shabaab oo "lagu burburiyey" duqeyn cirka ah
-
WARIYAHA MUQDISHO GAROWE ONLINE
- Posted On 08-02-2020, 03:26PM
MUQDISHO, Soomaaliya – Milatariga Mareykanka ayaa tafaasiil dheeri ah ka bixiyey laba duqeyn oo 6-dii Febraayo, 2020, ay ka fuliyeen nawaaxiga magaalada Jilib ee gobolka Jubada Dhexe.
Qoraal kasoo baxay taliska AFRICOM ayaa lagu sheegay in lala eegtay fariisimo ay Al-Shabaab ku lahayd halkaas.
Bayaanka ayaa lagu sheegay in xarun ay Al-Shabaab lahayd "si weyn loogu burburiyey mid kamid ah duqeymaha".
"Laba kamid ahaa argagixisadda Al-Shabaab ayaa ku dhaawacmay labadda duqeyn," ayuu raaciyey war-saxaafadeedka.
Talika Mareykanka ee qaaradda Afrika ayaa meesha ka saarey in waxyeelo soo gaarey shacab ay ka dhasheen howlgalka.
Dhanka kale, ma jiro wax war ah oo ku saabsan sheegashadda Mareykanka oo kasoo baxay dhanka Al-Shabaab.
Afar maalmood kahor ayay ahayd markii duqeyn Mareykanka uu ka geystay degaano ka tirsan Jubada Hoose la xaqiijiyey in lagu dilay dagaalame ka tirsanaa xoogaga xiriirka la leh Al-Qaacida.
GAROWE ONLINE
