Xasan: Farmaajo yuusan dulqaadka u qaadan dayuusnimo
-
WARIYAHA MUQDISHO GAROWE ONLINE
- Posted On 26-12-2021, 03:46PM
MUQDISHO, Soomaaliya - Madaxweynaha waqtigu ka dhamaadey Maxamed Farmaajo waa in uusan dulqaadka siyaasiyiinta u qaadan dayuusnimo, sida uu uga digay madaxweynihii xilka ku wareejiyay Xasan Sheekh Maxamuud.
Maxamuud oo warbaahinta la hadlay kadib kulan Midowga Musharaxiinta Madaxtinimada ku yeesheen Muqdisho ayaa sheegay in Farmaajo uu la "kufay taladii ay u dhiibteen shacabka Soomaaliyeed".
"Waxa Maxamed Cabdullaahi Farmaajo ku dhawaaqay xalay waali waaye aan ku imaan miyir iyo mas'uuliyad. Dulqaadka dadka in dayuusnimo loo qaato sax ma ahan," ayuu hoosta ka xariiqay Xasan Sheekh.
Sida laga soo xigtay hogaamiyaha xisbi siyaasadeedka Midowga Nabada iyo Horumarka oo luuqad adag adeegsadey, Farmaajo ayaa Soomaaliya wuxuu qarka u saarey burbur iyo colaad sokeeye.
"Midowga Musharaxiinta waxay ummadda Soomaaliyeed u sheegeen in wadada kaliya ee furan ay tahay shirka uu ra'iisul wasaaraha isugu yeeray Golaha Wadatashiga Qaranka iyo sixida qaladaadka," ayuu xusay.
Isaga oo hadalkiisa sii wata, Maxamuud oo taageeray shirka Golaha Wadatashiga Qaranka kuna baaqay in ay ka qeybgalaan saamileyda siyaasadda ayaa shaaciyey "laba qodob uu Farmaajo na kala doorad-siinayo".
"Maxamed Cabdullaahi Farmaajo wuxuu na kala doorsad siinayaa laba aan midkoodna la qaadan karin oo kala ah - waan sii joogayaa ama doorashada sidaan rabo loo qabanayaa - wax la aqbali karana ma ahan," ayuu tibaaxay.
Guddoomiyihii hore ee Golaha Shacabka, Maxamed Mursal Cabdiraxmaan oo uu tixraaxay khudbad uu shalay ka jeediyey xuska maalinta bileyska Soomaaliyeed, ayuu uga digay isku day kasta oo muddo kordhin kale.
"Maxamed Mursal hadda kahor ayuu dalkan khatar geliyey markii uu muddo kordhin sharci darro ah ku dhawaaqay. Waan ka digaynaa. Wadadaas mid la maro ma ahan. Waa xiran tahay. Horay ilaahey kuu asturay, ha u noqon," ayuu ku booriyey.
Madaxtooyadda Soomaaliya ayaa lagu waramay in ay ku fekereyso xil ka qaadista ra'iisul wasaaraha xilgaarsiinta Rooble, muddo kordhin laba sano ah oo Farmaajo loo sameeyo iyo dhismaha xukuumad ay qayb ka yihiin mucaaradka.
GAROWE ONLINE
