Xasan Sheekh oo ka qeybgalay aaska Queen Elizabeth II

Madaxweynaha Soomaaliya ayaa madaxda caalamka ee tagay duugta boqoradda Ingiriiska.

LONDON, United Kingdom - Madaxweynaha Soomaaliya ayaa Isniinta maanta ah waxa uu kasoo dhex-muuqdey aaska boqoradda geeriyootay ee Ingiriiska taasoo ka dhacaysa magaala madaxda London.

Hassan Sheikh Mohamud ayaa kamid ah madaxda caalamka ee tagay duugta Queen Elizabeth II. Madaxtooyadda Soomaaliya ayaan wali sharaxaad ka bixin sababta uu madaxwaynuhu u tagat aaska.

Dadka baraha bulshadda ka falcelinaya muuqaaladda iyo sawiradda oo aad loo faafiyey ayaa ka faalloonaya "murugada iyo tiiraanyadda gaarka ah" ee ka muuqata hogaamiyaha dalka.

Kadib aaskan, Xasan Sheekh ayaa ku laaban doona magaaladda New York halkaasoo uu kaga qeybgalayo munaasabadda shirka loo-dhan-yahay ee Qaramadda Midoobay.

Aaska kahor, madaxweynaha Soomaaliya ayaa saxiixay buugga tacsida. Warbaahinta dowladda ayaa sidoo kale waxay si kooban u tabisay ka qeybgalka Xasan Sheekh ee duugta.

Madaxweynaha Mareykanka Joe Biden ayaa sidoo kale wuxuu kamid yahay madax caalami ah ee ku sugan magaalada London kana qeybgalay aaska boqoradda Ingiriiska.

Hoggaamiyayaasha dalalka Barwaaqo-sooranka ayaa sidoo kale waxay kamid yihiin tobannaan madaxda dowladaha caalamka ka socda ee kasoo muuqdey aaska. Ammaanka ayaa aad loo adkeeyay London.

GAROWE ONLINE