Xasan Sheekh: Soomaaliya waxay u baahan tahay dib-u-habeyn siyaasadeed 

Djibouti, Djibouti – Madaxweynaha Soomaaliya, Xasan Sheekh Maxamuud, ayaa ku adkeystay in dalka uu u baahan yahay dib-u-habeyn siyaasadeed, isagoo sheegay in waqtigu yahay in la maalgeliyo hay’ado xooggan halkii laga tiirsanaan lahaa shaqsiyaad, si loo xaqiijiyo badbaadada iyo joogtaynta dalka.

Madaxweynuhu ayaa ka hadlay arrintan intii uu ka qeybgalayay munaasabad ka dhacday Djibouti, isagoo tilmaamay in qaabka hadda siyaasadda Soomaaliya ku dhisan tahay uu ku saleysan yahay shaqsiyaad halkii uu ka ahaan lahaa danaha dadka iyo hay’adaha muhiimka u ah maamul wanaagga.

“Waxaan rabnaa in aan dib-u-habeyn ku sameyno siyaasadda Soomaaliya,” ayuu yiri. “Waxaan u baahanahay nidaam siyaasadeed oo ku dhisan hay’ado iyo ururo, maaha shaqsiyaad.”

Xasan Sheekh ayaa sheegay in ku tiirsanaanta hoggaanka shaqsiyaad gaar ah ay ka dhigtay siyaasadda Soomaaliya mid aan la saadaalin karin oo jilicsan, halka nidaamyada hay’aduhu ay bixiyaan joogtaynta iyo isla xisaabtanka.

“Qofka aan maanta ahay wuxuu noqon karaa mid ka duwan galabta,” ayuu yiri, isagoo ku dooday in dowlad waarta ay u baahan tahay “nidaam ka sarreeya shaqsiyaad.”

Madaxweynuhu wuxuu sidoo kale sheegay in wax ka beddelka dastuurka uu dalka u baahan yahay, isagoo xusay in doorasho toos ah ay furi karto waddooyin cusub oo maamul wanaagsan. Si kastaba ha ahaatee, qaar ka mid ah dowlad-goboleedyada iyo hogaamiyeyaasha mucaaradka ayaa ka soo horjeestay wax ka beddelka dastuurka.

Waxay ku doodayaan in Soomaaliya aysan awoodin inay si buuxda u fuliso doorasho toos ah, isla markaana qaabkaasi uu keeni karo muddada xil haynta ee dastuur-darrada ah.

Madaxweynaha Xasan Sheekh ayaa ku adkeysanaya in dalka laga hirgeliyo nidaamkaas, isagoo ka go’an in uusan ka laaban. Hadalkan ayaa kusoo beegmaya xili mudo-xileedka Xasan Sheekh ka haray 6 bilood, islamarkaana dalka uu ka jiro khilaaf siyaasadeed.

GAROWE ONLINE