Xildhibaan Xaaji Cabdi Maxamed oo Mombasa ku geeriyoodey
-
- Posted On 12-02-2015, 11:25AM
February 12, 2015 (GO)- Xildhibaan Xaaji Cabdi Maxamed (Cabdi Yare) oo ka tirsanaa barlamanka federaalka ayaa maanta ku geeriyoodey magaalada Mombasa ee dalka Kenya. Xildhibaanka ayaa muddooyinkii u dambeeyey xanuunsanaa.
Xaaji Cabdi Yare oo muddo dheer kusoo jirey barlamanka kana soo galay gobolka Jubada Hoose wuxuu horay usoo noqdey duqa degmada Kismaayo.
Waa xildhibaankii saddexaad ee ka tirsan barlamanka Dowlada Federaalka ee geeriyooda intii lagu guda jirey sanadkan cusub ee 2015.
January 25, 2015 waxaa magaalada Muqdisho ku geeriyoodey Xildhibaan Maxamed Ibraahim Xaabsade. Sidoo kale, February 9, 2015 waxaa isla magaalada Muqdisho lagu toogtey Xildhibaan Cabdulaahi Qayaad Barre.
Tirakoob dhowaan la sameeyey ayaa lagu ogaadey in wadarta guud ee xildhibaanada ka tirsanaa barlamanka Somalia ee geeriyoodey tan iyo sanadkii 2004 ay tahay 81 xildhibaan.
Xildhibaanadaas ayaa u badan kuwo si dabiici ah u dhintey waxaase ku jira qaar kale oo lagu diley qaraxyo iyo dilal qorsheysan.
GAROWE ONLINE
