Xildhibaanada Federaalka oo ka horyimid wareejinta Barlamankii hore
-
- Posted On 12-12-2015, 05:10PM
Dec 12, 2015 (GO)- Kadib markii maalintii shaley Dec 11,2015 Gudoomiyaha gobolka Banaadir Yusuf Xuseen Jimcaale xaruntii hore ee Barlamanka Somalia ku wareejiyey ganacsade ayaa xildhibaanada barlamanka Federaalka kasoo horjeesteen talaabadaan.
Gudoomiyaha cusub ee gobolka Banaadir ayaa maalintii shaley Dec 11, 2015 ku wareejiyey milkiilaha Tv-ga Universal Ex-Barlaman halkaasoo la sheegey in laga dhisi doono goob loo soo dalxiis tago.
Kulan maanta xildhibaanada isugu yimadeen xarunta Barlamanka Federaalka Somalia magaalada Muqdishu ayey kaga hadleen talaabada u ku wareejiyey gudoomiyaha Banaadir hantida qaranka iyagoo ku tilmaamey iney tahay mid sharci daro ah islamarkaana go'aan deg deg ah kasoo saari doonaan.
Lama oga sababta keentey gudoomiyaha gobolka Banaadir u wareejiyey xaruntaan ka dhaxeysa ummada Somaliyeed ganacsade xilli uu xafiiskaan la wareegey Oct 26,2015.
Gudoomiyihii hore ee gobolka Banaadir Mungaab ayaa xilkaan laga wareejiyey kadib markii lagu soo eedeyey inuu shaqsiyaad gaar ah ka iibiyey dhismayaashii dowlada Somaliyeed.
Siyaasiyiinta dowlada Federaalka iyo maamulada gobolka Banaadir ayaa caadeystey iney wareejiyaan dhismayaashii dowlada Somaliyeed kuwasoo lagu dhisey tageeradii dhaqaale ee shacabka Somalia la siiyey tan iyo intii xornimada qaadateen.
Isbitaalka Digfeer, Iskuulkii Banaadir, xaruntii farsamada ee politichnico iyo kuwo kale ayaa gabi ahaanba lagu wareejiyey ganacsato iyo siyaasiyiin u dhashey dalka Turkiga.
GAROWEONLINE
