Madaxweyne Muuse Biixi oo la kulmay Hailemariam [Sawirro]
-
Wariyaha Hargaysa GAROWE ONLINE
- Posted On 16-01-2018, 11:49PM
ADDIS ABABA, Itoobiya - Madaxweynaha maamulka Somaliland Muuse Biixi Cabdi iyo wafdi uu hogaaminayo ayaa maanta gaarey magaalada Addis Ababa, ee xarunta dalka Itoobiya.
Wafdig Muuse Biixi waxaa Garoonka Diyaaradaha Bole International Airport ku qaabiley Wasiirka Arrimaha Dibadda ee dalka Itoobiya Workneh Gebeyehu, waxaana loo galbiyay dhanka Madaxtooyada.
Muuse Biixi Cabdi ayaa la kulmay Ra’iisal wasaare Hailemariam Desalegne, waxaana ay wadahadleen sidii ay iskaga kaashan lahaayeen danaha ay wadaagaan iyo xoojinta xiriirka maamulka Somaliland kala dhaxeeya dowladda Itoobiya.
Waxyaabaha ay sidoo kale isla soo qaadeen waxaa kamid ahaa isu-socodka, ganacsiga iyo doorka horumarineed ee uu labada dhinac u yeelan doono jidka isku xira Berbera iyo Wajaale.
Dhinaca kal Ethiopia ayaa kala hadlaysa Biixi qabsashada Tukaraq iyo in ciidamdiisa kala baxaan Tuulada Tukaraq.
Waa booqashadii ugu horeysay oo Madaxweyne Muuse Biixi Cabdi uu ku tago dalka Itoobiya, tan iyo doorashadiisii 13-kii November, ee 2017-kii, isagoo xilka kala wareegay Axmed Siilaanyo.
Somaliland ayaa 15% dhaqaalaha kasoo gala Dekedda Berbera u qoondaysay dowladda Itoobiya, oo xiriir aad u xoogan kala dhaxeeya, iyadoo maamulkan oo sheegay inuu Soomaaliya ka go'ay 1991 mudo dheer raadinayo aqoonsi caalami ah.
GAROWE ONLINE
