Coldoon oo dib u helay xorriyadiisa kana warbixiyey sii deyntiisa
-
WARIYAHA HARGEYSA GAROWE ONLINE
- Posted On 06-06-2020, 03:00PM
HARGEYSA, Somaliland – Cabdimaalik Sheekh Muuse Coldoon ayaa maanta oo Sabti ah wuxuu xorriyadiisa dib ku helay cafis uu u fidiyey madaxweynaha Somaliland, Muuse Biixi Cabdi, sidda uu sheegay warbaahinta.
Coldoon oo Burco laga soo xiray 14 bishii 4aad 2019 ayaa bishii July 8-deeda lagu xukumay saddex sano oo xarig ah, isagoo lagu soo oogay dacwado ay kamid yihiin "jabinta nidaamka u degan Somaliland".
Hay'addo u dooda xuquuqda aadanaha oo isugu jira waddani iyo heer caalami ayaa si wadajir ah u cambaareeyay xariga Coldoon, waxayna si joogto ah cod dheer ugu baaqayeen in uu dib u helo xorriyadiisa.
Kadib sii deyntiisa, Coldoon ayaa u mahadceliyey mucaaradka Somaliland oo uu sheegay in ay kaalin ka qaateen talaabada lagu sii daayey. Sidoo kale, Biixi ayuu ku bogaadiyey in uu ogolaado sii deyntiisa.
Si lamid ah, wuxuu u mahadceliyey hay'addaha u dooda xuquuqda aadanaha oo uu ka carabaabay Amnesty International iyo Human Rights Watch. Kaalintooda u ololeynta sii deyntiisa ayuu ku ammaanay.
"Baarlamaanka Midowga Yurub oo arrinteyda ka hadlay iyagana aan u mahadcelinayaa," ayuu hadalkiisa raaciyey saxafiga isagoo war-fidiyeenka kula hadlay Hargeysa.
Wuxuu ku daray: "Maanta aniga hadal aargoosi ah ama hadal maag ah halkaan kama oranayo, waad og-tihiin mar-xaladda aynu ku jirno iyo xaalada aynu mareyno, waa mar-xalad ay tahay in aan gacmaha is-qabsano, waxaan ku baaqayaa gacmaha is-qabsano, in aan bog cusub furno".
"Waxaan kaloo u mahadcelinayaa oo aan ilaabay oo aysan ahayn in aan ilaabo Hooyadey oo iyaddu xirneyd oo aan anigu xirneyn oo maalin walba Burco ka imaaneysay. Ehelkeyga ayaan u mahadcelinayaa sidda ay iigu dulqaateen Ilaahey haka abaalmariyo," ayuu tibaaxay.
Warbaahinta u muujisay garab istaaga iyo dhamaan cid kasta oo ka xumaatay xarigiisa ayuu sidoo kale sheegay "in u abaal-hayo una mahadcelinayo".
Coldoon oo ah aas-aasaha warbaahinta Jiritaan iyo wariye tabiya wararka la xiriira samafalka ayaa xarigiisa bar-madow ku noqdey xukuumadda Biixi, waxayna qabashadiisu timid markii uu kasoo laabtay magaalada Muqdisho.
GAROWE ONLINE
