Madaxweynihii hore ee Pakistan Pervez Musharraf oo dil lagu xukumay
-
Wariyaha Arrimaha Caalamka Garowe Online
- Posted On 17-12-2019, 11:01AM
ISLAMABAD - Maxkamadda gaar ah oo ku taalla Pakistan, ayaa maanta oo Talaado ah xukun dil ah ku riday Madaxweynihii hore ee dalkaasi, Pervez Musharraf oo lagu eedeeyay "qiyaanno-qaran".
Kiiska qiyaannada-qaran ee ka dhanka ah Musharraf ayaa billowday 2014, iyadoo lagu haysto inuu xalaad degdeg ah geliyay Pakistan November 3, 2007.
Musharraf, oo hadda dibad-joog ku ah magaaladda Dubai ee wadanka Imaaraadka ayaa beeniyay eedeymaha loo jeediyay.
Hogaamiyahan oo gacan-bir ah kusoo maamulay Pakistan intii u dhaxeysay 2001 illaa 2008, ayaa laalay dastuurka dalkiisa 2007, isagoo xabsiga dhigay siyaasiyiin sare iyo qareenno.
Musharraf ayaa awoodda kula wareegay afgembi militeriga 1999, isagoo labo sano kadib dalkan ku yaalla Koonfurta Asia ka noqday Madaxweyne, wuxuuna xilkaasi hayay 8 sano.
Wuxuu xukunka ka degay 2008 kadib markii xisbigiisa looga adkaadey doorasho guud oo ka dhacday Pakistan.
Musharraf, oo 76 jir ah ayaa ku dhashay magaaladda New Delhi 1943, afar sano kahor inta aysan Pakistan ka go'in India.
GAROWE ONLINE
