Faransiiska: Nin toorey ku hubeysan oo galaaftay saraakiil boolis

PARIS, France – Nin ku hubeysan Toorey ayaa weeraray saraakiil ku sugan saldhig boolis oo ku yaala Paris, sida ay wararku sheegayaan. Gacan ku dhiiglaha wuxuu dilay afar askar kahor inta aan la toogan.

Ugu yaraan hal askar ayaa si daran u dhaawacmay, sidda uu baahiyey Tv-ga maxaliga ah ee BFM. Illo wareegay ayaa Wakaaladda wararka ee Reuters u xaqiijiyey in dableyga la khaarijiyey.

Dhinaca kale, afhayeenka bileyska magaaladda caasimada ah ee Paris ayaa wuxuu ka gaabsaday in uu ka hadlo dhacdadan.

Kadib falkan, saldhigyo kale oo boolis oo ku yaala isla magaaladda ayaa albaabada loo laabay, sababo ku aadan weeraro kale.

Christoper Castaner, wasiirka arrimaha gudaha Faransiiska, oo meesha ay wax ka dhaceen tegay ayaa kormeeray xaaladda.

Illaa iyo haatan ma cadda ujeedada ka dambeysa falkan. Balse, baareyaasha ayaa ku dhawaaqay in ay baadigoobayaa xuduntiisa.

Faransiiska ayaa waxaa horey u soo maray weeraro dhimasho dhaliyey oo ay ku lug-yeesheen kooxaha Jihaad-aloosyaasha ah, kuwaas oo qaarkood ay sababeen in dalka uu galo xaalad degdeg ah iyo bandow.

GAROWE ONLINE