Ruux isku hor gubay banaanka mid kamida xarumaha hay'addaha UN-ka
-
WARIYAHA ARRIMAHA CAALAMKA GAROWE ONLINE
- Posted On 26-10-2019, 11:38AM
GENEVA, Switzerland – Nin reer Suuriya ah kana soo jeeda Kurdiyiinta ayaa Arbacadii isku hor-gubay banaanka xarunta Hay'adda Qaramadda Midoobay u qaabilsan Qaxootiga ee Geneva.
Ruuxan oo degan waddanka Jarmalka kaasoo jirkiisa uu gubtay %80 ayaa waxaa la dhigay Isbitaal kahor inta aysan boolisku ku guuleysan in ay baqtiijiyaan dabka.
Bukaanka ayaa waxaa la filayaa in uu Isbitaalka kusii jiro.
"Maadaama xaaladiisa ay tahay mid aanan xasilooneyn, ma ahan macquul in aan ogaano waxa ku kalifay dhacdadan, balse waxaan aaminsanahay in ay salka ku hayso arrimo siyaasadeed," ayuu yiri bileyska.
War qoraal ah oo kasoo baxay UNCHR ayaa lagu sheegay in ay ka xun tahay falka uu ku dhaqaaqay shaqsigan aan wali la magacaabin.
"Dhismaha xarunta UNHCR ayuu isku dayey in uu galo, balse saraakiisha amniga waxay ka hor istaageen talaabadaas," ayuu raaciyey.
UNHCR ayaa ayaa badi xarumaheeda waxay ku yaalaan hareeraha wadooyinka, sababtuna waa in ay magan-galyo siiso qaxootiga.
Dhacdadaan ayaa gilgilashay quluubta dad badan, wallow warbaahinta caalamka lagu dhaliilay in ay ka gaabisay baahinta arrintaan.
GAROWE ONLINE
