Tobanaan ruux oo ku naf-waayey dab qabsaday dhisme ku yaala India
-
WARIYAHA MUQDISHO GAROWE ONLINE
- Posted On 08-12-2019, 11:52AM
NEW DELHI, India – Dab culus oo qabsaday dhismaha shirkad farsameysa Boorsooyinka oo ku yaala caasimadda India ee New Delhi ayaa dilay 43 shaqaale, sidda ay sheegeen mas'uuliyiinta.
Booliska ayaa shaaca ka qaadey in dabka uu ka kacay afar bakhaar, subaxnimadii Axadda maanta ah.
Ugu yaraan 100 ruux ayaa markii uu dabka kacayey jiifay gudaha shirkadda, oo aalaaba farsameysa Boorsooyinka dugsiyadda.
In ka badan 60 qof oo kamid ah shaqaalaha shirkaddan ayaa la sheegay in lasoo badbaadiyey iyaga oo aan waxba soo gaarin.
Ra'iisul wasaare Narendra Modi oo dhacdadaan ku sifeeyay "mid argagax leh" ayaa tacsi u diray eheladda dadka ku nafwaayey musiibadda.
Dab-damiska New Delhi ayaa sheegay in saacado badan kadib ay ku guuleysteen in ay damiyaan dabka.
Magaalooyinka India ayaa waxaa xiliyadda qaar ka kaca dab xoogan, iyadda oo sababta lagu sheego in uu hooseeyo shuruucda lagula xisaabtamo badqabka shaqaalaha shirkadaha waaweyn.
GAROWE ONLINE
