13 Qof oo ku dhintay Dagaal ka dhacay Goof-gaduud
-
- Posted On 09-05-2017, 03:57PM
BAYDHABO, Somalia- Dagaal xoog leh ayaa maanta ka dhacay deegaanka Goof-gaduud ee gobolka Baay, kaasoo u dhaxeeyay Al Shabaab iyo ciidamo katirsan kuwa maamulka Koonfur Galbeed.
Isku dhaca labada dhinac ayaa keenay in kooxda Al Shabaab muddo kooban gacanta ku dhigto deegaankaas oo ay saldhig ku leeyihiin ciidamo katirsan kuwa dowladda Somalia iyo maamulka Koonfur Galbeed.
Khasaaro xooggan ayaa ka dhashay dagaalkaas, waxaana la xaqiijiyay dhimashada 13 qof oo kamid ah dhinacyadii dagaallamay.
6 kamid ah waa ciidamada maamulka Koofur Galbeed oo Miino la qaraxday iyagoo watay baabur Cabdi Bile ah xilli ay gurmad usoo ahaayeen dagaalka kasocday Goof-gaduud.
Waxaa ku dhaawacmay 10 kale oo kamid ah xoogaga labada dhinac.
Wararka uu helayo GO, ayaa sheegaya in mid kamid ah gaadiidka dagaalka uu gacanta u galay kooxda Al Shabaab.
Shiino Macalin Nuurow, oo taliyaha ciidamada Booliiska gaarka ah ee maamulka Koonfur Galbeed, ayaa beeniyay in kooxda Al Shabaab gacanta ku dhigeen deegaanka Goof-gaduud, isagoo qiray inay joogaan iminka ciidamadoodu.
Gurmadyo xoog leh oo ayaa kusii jeeda deegaankaas oo qiyaastii 30KM dhinaca Waqooyi uga beegan magaalada Baydhabo.
Xaaladda Goof-gaduud Shabeelow ayaa iminka kacsan, waxaana hareeraha magaalada laga maqlayaa rasaas goos goos ah.
Dhowr jeer oo hore kooxda Al Shabaab ayaa dagaal kusoo qaaday deegaankan oo fariisin u ah ciidamada dowladda iyo kuwa maamulka Koonfur Galbeed.
Majirto ilaa hadda cid katirsan dowladda Federaalka iyo maamulka Koonfur Galbeed oo dagaalkan sharaxaad ka bixiyay.
GAROWENLINE
