GEDO: Al Shabaab oo la wareegtay deegaanka Tarako
-
- Posted On 26-09-2017, 09:17AM
TARAKO, Somaaliya - Dagaalyahanada Al Shabaab ayaa si buuxda ula wareegay gacan ku heynta deegaanka Tarako, oo ku yaalla gobolka Gedo, kadib markii ay shalay gelinkii dambe isaga baxeen Ciidamada dowladda Kenya, ee qeybta ka ah AMISOM.
Saraakiil katirsan Ciidamada Xoogga dalka oo ku sugan gobolka, ayaa Warsidaha Garowe Online u xaqiijiyay Ciidanka Kenya ay faarujiyeen Deegaanka, balse inaysan garaneynin sababta ka bixitaanka
Waxay sheegeen in Ciidamada halkaasi kasoo baxay, ay u guureen saldhigyo ku yaalla degmada Ceel-Waaq, oo ay joogaann Ciidamo kale oo Kenyan ah, oo 5 maalmood kahor kasoo baxay Baardheere.
Deegaanka Tarako oo 55KM u jirta magaalada Baardheere waxay Ciidamada Kenya la wareegeen horaantii sanadkii 2015-kii, waxaana ay ahayd goob muhiim ah oo isku xirta degmooyinka gobolka Gedo.
Korneel Guhaad Maxamed Cumar oo ka tirsan saraakiisha Ciidamada Dowladda ee Gedo oo la Garowe Online, ayaa sheegay in Ciidanka Kenya ay mas'uul ka yihiin in soo laabashada Al shabaab ee gobolka.
GAROWEONLINE
