Aqalka Sare oo ansixiyey sharciga hay'adda sirdoonka Soomaaliya

31-Sanatar ayaa ogolaaday meelmarinta sharciga, saddex Sanatar ayaa diiday halna waa ka aamusay.

MUQDISHO, Soomaaliya - Guddoomiye ku xigeenka koowaad ee Aqalka Sare, Cali Shacbaan Ibraahim oo uu wehliyay Guddoomiye ku xigeenka labaad, Cabdullaahi Cali Xersi (Timacadde) ayaa maanta guddoomiyay kalfadhiga labaad kulankiis 15-aad.

Ajandaha Kulanka ayaa ahaa Akhrinta Kowaad ee Hindise Sharciyeedka Hay'adda Socdaalka iyo Jinsiyadaha iyo Akhrinta 3-aad iyo ansixinta Hindise Sharciyeedka Hay'adda Sirdoonka iyo Nabad Sugidda Qaranka.

Ugu horrayn, Sanatarrada Golaha ayaa Wasiir Dowlaha Wasaarada Amniga Gudaha, Maxamed Cali Xagaa ka dhagaystay akhrinta koowaad ee sharciga Hay'adda Socdaalka iyo Jinsiyadaha.

Dhegeysigan kadib, mudaneyaasha ayaa gudda galay akhrinta 3-aad ee sharciga Hay'adda Sirdoonka iyo Nabad Sugidda Qaranka, waxaana dood iyo soo jeedin sharciga Sanatarrada qaar ay ka qabeen la gudagalay ansixinta.

Sidda uu ku dhawaaqay guddoonka golaha, 31-Sanatar ayaa ogolaaday meelmarinta sharciga, saddex Sanatar ayaa diiday halna waa ka aamusay.

Ugu danbayn, mR Xagaa ayaa Sanatarrada Aqalka Sare waxa uu uga mahad celiyay meelmarinta sharciga Hay'adda Sirdoonka iyo Nabad Sugidda Qaranka oo meesha ka saari doona tabashooyin iyo caqabado badan oo ku xeernaa shaqada Hay’adda.

GAROWE ONLINE