Ciidamada dowladda Federaalka Somalia oo Howlgallo ka sameeyay Muqdishu
-
- Posted On 28-05-2017, 12:49PM
MUQDISHU, Somalia - Howlgal ballaaran, oo lagu xaqiijinayo amniga Muqdishu, ayaa saaka ka dhacay qeybo ka tirsan magaalada, kuwaasi oo lagu soo qabtey dhalinyaro looga shakiyay inay yihiin Al shabaab.
Ciidamada oo isagu jira Boolis iyo Nabad Sugida ayaa xiray Wadooyinka KM4, Tarabuunka, Wadada Wadnaha, Jidka 30-ka iyo Warshadaha, waxaana ay hakad geliyeen Gaadiid dadweynaha inta uu socday howlgalkooda.
Howlgalka oo qeyb ka ah Barnaamijka Xukumadda ay ugu magac-dartey Xasilinta Caasumadda, ayaa waxaa lagu soo qabtey hub, walxaha qarxa iyo dhalinyaro badan, oo looga shakiyay inay katirsan yihiin Al shabaab.
Ciidanka waxay baareen guryo ku yaalla dhowr Xaafadood, waxaana ay kasoo qabteen dad badan, oo markii dambe meel banaan ah isugu geeyay iyagooo ka xiran indhaha, kuwaasi oo markii uu howlgal dhamaadey loo qaadey Xarunta Dembi-baarista CID-da.
Waa Wajigii labaad, ee howlgalka Xasilinta Caasumadda, oo loogu talo galay in looga hortago weerarada Al shabaab, inta lagu guda jiro bisha barakeysan ee Ramadaan-ka, oo labo mareysa Maanta.
GAROWEONLINE
