Dab ka kacay Suuq weyn oo ku yaalla magaalada Muqdishu
-
- Posted On 02-09-2017, 11:29PM
MUQDISHU, Somalia - Dab xooggan ayaa caawa ka kacay gudaha Suuq Bacaad, oo ah Suuqa labaad ee ugu weyn magaalada Muqdishu, ee Caasumdda dalka Somalia.
Goobjoogiyaal ayaa u sheegay Warsidaha Garowe Online in dabka uu kacay Salaadda Maqrib kadib, kadibna uu cagta mariyay Dhismooyin Ganacsiga oo badan, Dukaamo Cuntooyin iyo alaabo kala duwan lagu iibiyo.
Shaqaalaha Dab-demiska maamulka gobolka Banaadir, oo wata baabuurta Booyadaha Biyaha, ayaa goobta gaarey, kuwaasi oo sameynaya dedaallo ay ku deminayaan dabka.
Waxaa lagu soo waramaya in dabeylo socda ay si xowli ah dabka ugu sii fidinayaan qeybaha kale ee Suuqaasi. Lama oga waxa keenay inuu dabka kaco, balse Ganasatada qaar oo la hadlay GO ayaa sheegay inay u maleynayaan cillada Koronto.
Wararka ayaa sheegaya inay socdaan baaritaan ay wadaan Saraakiisha amniga degmada Yaaqshiid, ee ah halka uu ku yaallo Suuq Bacaad.
Inta badan Suuqyada Muqdishu waxaa ka kaca dab noocan ah, oo baabi'iya hanti badan oo Ganacsato leeyihiin, iyadoo jiriin Hay'ado gaar ah oo maamulka gobolka u xil-saarey wax-kaqabashada musiibooyinkan soo noq-noqonaya.
GAROWEONLINE
