Faahfaahin ka soo baxaysa weerar ay AS ku qaadeen deegaan u dhow Guriceel

GURICEEL, Soomaaliya - Ciidamada Dowladda Federaalka iyo kuwa deegaanka ayaa waxaa u suurtagashay in ay iska Caabiyaan weerar ay AS ku soo qaadeen deegaanka Bari-Ujeed ee Gobolka Galgaduud, waxaana halkaasi ka dhashay khasaare xooggan oo soo gaaray ururka.

AS ayaa markii hore la wareegay gacan ku heynta deegaanka ka hor inta aysan dib u qabsan ciidamada dowladda, waxaana dagaalkaas ku dhaawacmay mas’uuliyiin ka tirsan gobolka iyo deegaanka, sida ay sheegayaan wararka la helayo.

Guddoomiyaha degmada Guriceel, Faarax Axmed Macallin, ayaa xaqiijiyay in ciidamada dowladda ay weli gacanta ku hayaan deegaanka, wuxuuna sidoo kale tilmaamay in ciidamada dowladdu ay la wareegeen gaadiid dagaal oo ay ka carareen xubnaha AS.

Deegaanka Bari-Ujeed ayaa u dhow degmada Guriceel ee gobolka Galgaduud, waxaana ku yaala laba fariisimo oo ay ku lee yihiin Ciidamada Dowladda iyo kuwa Maamulka Galmudug, waxaana loo arkaa mid udub dhaxaad u ah difaacida Magaalooyinka Istraatiijga ah ee ku yaalla Galgaduud.

GAROWE ONLINE