Faahfaahinta qarax xoogan oo ka dhacay Magaalada Muqdisho

SAWIRKA: Goobjoogayaal

MUQDISHO, Soomaaliya - Qarax Ismiidaamin ah oo loo adeegsaday Gaari laga soo buuxiyay walxaha Qarxa ayaa maanta lagu weeraray Xerada Dhul-bixinta eay maamusho dowladda hoose.

Gaarigan ayaa isku deyay inuu xoog ku soo dhaafo bar kantrool ay ciidamado ku leeyihiin wadada warshadaha, taasoo keentey inay rasaas kaga hortagaan.

Gaarigan ayaa ahaa mid aan xabadu karin, waxa uuna markii dambe ku qarxay gudaha Xerada.

Wararka hordhaca ah ayaa sheegaya in qaraxaasi ay ku dhinteen 3 askari tiro kalena ay ku dhaawacmeen. Laamaha amaanka ayaan wali wax war ah kasoo saarin dhacdadan.

Qaraxaan ayaa si weyn looga maqlay magaalada Muqdisho, iyada oo guriyaha qaar gariirka qaraxa laga dareemay, sida ay sheegeen goob-joogayaal ku dhaqan Caasimadda.

Dhacdadan ayaa kusoo beegmeysa xili ciidamada ay ku dhawaaqeen in deegaano dhowr ah ay ka xoreeyeen kooxda Al-Shabaab.

GAROWE ONLINE