Gudoomiyaha midowga Africa oo imaanaya Muqdishu, wadooyinka xiran
-
- Posted On 18-03-2017, 10:22AM
MUQDISHU, Somalia - Ciidamada dowladda Soomaaliya ayaa saakay xiray wadooyinka magaalada Muqdishu, oo la filayo inuu booqasho ku yimaado Gudoomiyaha cusub, ee Ururka Midowga Africa Moussa Faki Mahamat.
Shacabka ayaa ku waaberiistay saakay wadooyinka oo xiran iyo ciidamo lasoo dhoobay Isgoysyada kuwaasi oo celinaya Gaadiidka dadweynaha, ee isaga kala gooshi jirey wadooyinka caasumadda.
Ciidamada Booliska iyo kuwa Nabad Sugida Soomaaliya ayaa gaadiidka dagaalka waxay ku gooyeen wadooyinka waaweyn, oo ay kamid yihiin Makka Al Mukarama, KM4, Zoobe, Banaadir iyo Isgoyska Dabka.
Gaadiidka Mas'uuliyiinka iyo shaqaalaha dowladda oo kaliya ayaa loo ogolaanayaa inay isticmaalaan wadooyinka xiran, iyadoo shacabka ay u lugaynayaan goobahooda ganasciga iyo waxbarashada.
Magaalada Muqdishu ayaa caadi ka noqotay in marka ay soo booqanayaan Mas'uuliyiinta sare la xiro wadooyinkeeda, taasi oo muujinaysa sawir ah in amniga caasumadda dalka aan la isku halayn karin.
Fah-faahinta wagdigaaan ka filo Wararkeena dambe hadii Alle idmo.
GAROWEONLINE
