Halkee ayay marayaan wadahadallada DF iyo Somaliland ka dib aqoonsigii SSC-Khatumo?
-
GAROWE ONLINE XAFIISKA MUQDISHO
- Posted On 28-10-2023, 11:18AM
MUQDISHO, Soomaaliya - Ergayga Madaxweynaha Soomaaliya u qaabilsan Arrimaha Somaliland, Cabdikariim Xuseen Guuleed, ayaa ka hadlay halka ay marayso wadahadallada labada dhinac, ka dib markii la aqoonsaday Maamulka SSC-Khaatumo.
Isagoo khudbad ka jeedinayay munaasabad lagu xusayay 25-guuradii kasoo wareegtay aasaaskii Dusgiga Axmed Guray, ayuu Ergeyga sheegay in wada-hadallada ay sii socon doonaan, isla markaana aysan waxba iska bedelin siyaasadda dowladda Soomaaliya ee ku aaddan Somaliland.
Dowladda Federaalka oo uu wakiil ka yahay Wasiirka Arrimaha Gudaha Axmed Macallin Fiqi ayaa dhawaan ku dhawaaqay in ay aqoonsadeen maamulka SSC-Khaatumo ee uu hogaamiyo Cabdulqaadir Firdhiye.
Talaabadan ayaa waxaa taageeray siyaasiyiin iyo waxgarad Soomaaliyeed, kuwaasi oo ku baaqay in la xoojiyo midnimada, oo lala dagaalamo fikradaha gooni u goosadka ah ee sida xun u saameeya amniga dalka.
GAROWE ONLINE
