Ingiriiska oo soo saarey qaylo-dhaan la xiriirta Soomaaliya

Wasiirka horumarinta Ingiriiska, Andrew Mitchell, ayaa hadalkan ka sheegay magaaladda Doolow.

LONDON, UK - Wasiirka horumarinta Ingiriiska, Andrew Mitchell ayaa BBC-da u sheegay "dad aad u badan oo ay abaaruhu ku dhufteen ay halis ugu jira inay dhimasho" gudaha Soomaaliya haddii beesha caalamku aysan bixin gargaar dheeri ah.

Booqashadii uu ku tagay galbeedka Soomaaliya ayuu ku sheegay in UK ay bixineyso lacag dhan £14m oo gargaar bani’aadanimo iyo mid amni oo cusub oo loogu talagalay dadka wajahaya macluusha ka dib markii isbeddelka cimilada oo lala xiriiriyey abaartii ugu darneyd muddo 40 sano ah.

Mr Mitchell ayaa sheegay in wax aan la aqbali karin ay tahay in dunidu ay dayacdo dadka ku dhimanaya Geeska Afrika, sababta oo ah lacag badan oo gargaar ah ayaa loo weeciyay dalka Ukraine. Waxa uu ku adkaystay in Britain ay muujinayso door hogaamin iyada oo la tacaalaysa labada arrimood isku mar inkasta oo la dhimay miisaaniyadda kaalmada dibadda ee UK.

Laakin waxa uu qirtay in ay "aad u adag tahay" in xafiiska arrimaha gudaha uu balaayiin gini oo gargaar ah ku kharash gareeyo magangalyo-doonka, wuxuuna rajeeyay "inay weligeed sii socon doonin" sababtoo ah "waxay caqabad ku tahay" jawaabta bini'aadantinimo ee UK ee dibadda.

Wuxuu daaha ka qaaday inuu dhisayo guddi cusub oo wadajir ah oo la socda Hanti-dhowrka si ay u baaraan kharashaadka gargaarka ee dowladda oo dhan.

Hadalkan ayuu ka jeediyay Doolow oo ku taalla dhulka galbeedka Soomalaiya, halkaasoo ay ugu dambeysay 11 sano ka hor xilligaas oo uu ahaa Xoghayaha Horumarinta Caalamiga ah.

Magaalada ku dhow xuduudka Itoobiya ayaa noqotay mid ay kusii qulqulayaan dadka abaaruhu ay ka baabi’iyeen xoolihii iyo noloshoodii. Hadda waxa jira ilaa 134,000 oo qof oo ku jira laba xero oo waaweyn oo qaxooti gudaha ah magaalada ah.

GAROWE ONLINE