KISMAAYO, Jubaland - Khasaaro kala duwan ayaa ka dhashay qarax loo adeegsadey gaari oo aroornimadii Talaadada maanta ah  lagu weeraray guriga martida magaalada Baardheere ee gobolka Gedo.

Weerarka ayaa imaanaya xilli magaalada ay bilooyinkii lasoo dhaafay martigelisay dhaqdhaqaaqyo siyaasadeed. Dagaalameyaasha Al-Shabaab ayaa dusha saartey mas'uuliyadda falkan.

Ugu yaraan laba qof oo u badan dad shacab ah ayaa la xaqiijiyey in ay ku nafwaayeen dhowr kalana ay ku dhaawacmeen qaraxa Baardheere oo la sheegay in uu fuliyey naftii—halige.

Muuqaalada laga helay goobta oo qaar kamid ah uu arkay warsidaha Garowe Online ayaa muujinaya burbur xoog leh oo soo gaarey guriga martida magaalada oo la beegsadey.

Gudoomiyaha Gobolka Gedo, Axmad Buule, ayaa lagu waramay in uu kamid yahay dadka ay waxyeeladda kasoo gaartey qaraxa is-miidaaminta ah ee Baardheere.

Fahfaahinta ayaa intaas ku daraysa in mas'uulkan xaaladiisa lagula tacaalayo mid kamid ah xarumaha caafimaadka magaalada isla markaana dhaawaciisu uu yahay mid aan buurneyn.

Baardheere ayaa bilooyinkii lasoo dhaafay waxay fariisin u ahayd siyaasiyiin ay kamid yihiin Senator Fartaag iyo Wasiir hore Cabdirashiid Janan kuwaasoo wada abaabul ka dhan ah maamulka Jubaland.

GAROWE ONLINE