Khilaaf ka qarxay madaxtooyada Galmudug oo xagal daacin kara dagaalka ‘AS’
-
GAROWE ONLINE XAFIISKA MUQDISHO
- Posted On 06-09-2023, 05:16PM
DHUUSAMAREEB, Soomaaliya - Khilaafka u dhaxeeya madaxda maamulka Galmudug Axmed Cabdi Qoorqoor iyo ku xigeenkiisa Cali daahir Ciid ayaa banaanka usoo baxay kadib markii labada dhinac ay soo kala saareen go’aamo iska soo horjeeda.
Madaxweyne ku xigeenka maamulkaasi Cali Ciid ayaa soo saaray amar uu shaqada kaga joojinayo wasiirka arrimaha gudaha maamulka Galmudug Cabdi Maxamed Jaamac oo uu ku eedeeyay in uu carqaladeynayo dadaallada lagula dagaalamayo argagixisada.
Halka Xafiiska Madaxweynaha Dowlad Goboleedka Galmudug oo xil ka qaadistan kaga jawaabay diidmo, isagoo soo saaray amar lagu burinayo amarka Madaxweyne ku xigeenka, maadaama uu khilaafsan yahay dastuurka Galmudug sida lagu sheegay bayaanka.
Xiisadan ayaa bilaabatey ka dib markii Madaxweyne ku xigeenka Galmudug uu kala direy golaha deganaaka Caabudwaaq.
Golihii deegaanka ayaa isla markaana xil ka qaadis ku sameeyey gudoomiyaha degmada, halka Madaxweynaha Galmudug uu taageeray go’aanka golaha.
Khilaafkan siyaasadeed ayaa imaanaya xilli maamulka Galmudug uu ka socdo dagaal ka dhan ah kooxda ‘AS’, waxaana khubarada dhanka ammaanka ay ka digeen in la kala qeybiyo madaxda inta lagu jiro marxaladan muhiimka ah.
GAROWE ONLINE
