Kusimaha Ra’iisul Wasaaraha oo gaaray Dhuusamareeb

DHUUSAMAREEB, Soomaaliya - Waxaa dhawaan gaaray magaalada Dhuusamareeb Ra’iisul Wasaare ku-xigeenka dalka Saalax Axmed Jaamac iyo wafdi uu hogaaminayo, iyaga oo sii diiran loogu soo dhaweeyay Garoonka Diyaaradaha Dhuusamareeb.

Mas’uuliinta soo dhaweeyay ayaa ka mid ahaa Madaxweyne ku-xigeenka Maamulka Galmudug Cali Daahir Ciid iyo sidoo kale shaqsiyaad xilal ka haaya Dowlad-Goboleedka Galmudug iyo Dowladda Federaalka.

Kusimaha Ra’iisul Wasaaraha ayaa la filaya in uu magaalada Dhuusamreeb kulamo kula qaato madaxda sare ee dowladda oo halkaas ku sugan iyaga oo ka wada hadli doona dardargelinta dagaalka ka dhanka ah kooxda Al-Shabaab.

Magaalada Dhuusamareeb ayaa haatan martigelinaysa madaxda ugu sarreeya dalka iyada oo ay soo gaareen todobaad ka hor Gudoomiyayaasha laba aqal, halka Madaxweynaha uu halkaas fadhi ka dhigtay si uu u kuurgalo dagaalka.

GAROWE ONLINE