Madaxweynaha Somalia oo Abu Dhabi lagusoo dhaweeyay
-
- Posted On 10-04-2017, 08:59AM
MUQDISHU, Somalia- Madaxweynaha dowladda Federaalka Somalia, Maxamed Cabdullaahi Farmajo ayaa xalay gaaray waddanka Imaaraadka Carabta gaar ahaan magaalada Abu Dhabi, waxaana kusoo dhaweeyay madax sare oo dalkaas katirsan.
Farmajo ayaa shalay galinkii dambe ka safray magaalada Caasumadda ah ee Muqdishu, isagoo dalkaas ku tagay casuumad rasmi ah oo ku helay boqortooyada waddankaas.
Inkastoo aysan dowladda Somalia faah faahin ka bixin socdaalkan, hadana wararrku waxay sheegayaan inuu la xariiro adkaynta xiriirka labada waddan oo muddooyinkii dambe mugdi ku jiray.
Madaxweyne Farmaajo ayaa lagu wadaa inuu la kulmo Dhaxal sugaha Abu Dhabi, ahna Abaanduulaha Ciidamada qalabka sida ee dowladda Isu tagga Imaaraadka Carabta Sheekh Mohamed bin Zayed Al Nahyan iyo Mas’uuliyiin kale.
Waxaa sidoo kale la filayaa in kulankaas looga hadlo xaaladda ka jirta dalka Somalia gaar ahaan Abaaraha iyo dagaalka dowladdu Iclaamisay ee ka dhanka ah Al Shabaab.
Dowladda Imaraadka ayaa door weyn ku lahayd hormarinta iyo gacan siinta dowladda Somalia gaar ahaan wixii ka horeeyay doorashadii dhawaan dhacday.
GAROWEONLINE
