Madaxweynaha Somalia oo booqday Xabsiga dhexe Muqdishu

MUQDISHU, Somalia- Madaxweynaha dowladda Federaalka Somalia, Maxamed Cabdullaahi Farmaajo ayaa maanta booqday xarunta Xabsiga dhexe ee Muqdishu isagoo soo indha indheeyay dhammaan xarumaha kala duwan jeelka.

Wuxuu soo maray dhammaan, xarumaha lagu hayo Maxaabiista, goobta tababarka Maxaabiista, xarumaha waxbarasho jeelka iyo kuwo  kale, iyadoo ay soo dhaweyn ugu sameeyeen goobtaasi   Taliyaha Ciidanka Asluubta Soomaaliyeed sarreeye Guud Bashiir Maxamed Jaamac, Xeer ilaaliyaha Guud ee Qaranka Axmed Cali Daahir, Wasiirka Cadaaladda Gen C/llahi Jaamac Ilka-jiir iyo Saraakiil kale.

Taliyaha Ciidanka Asluubta Somalia, Sarreeye Guud Bashiir Maxamed Jaamac ayaa Madaxweynaha uga waramay duruufaha ay ku shaqeeyaan, wuxuuna tilmaamay in muddo badan lasoo daalaa dhacayeen mushahar iyo daryeel la'aan, balse markasta muhiimadoodu ahayd in dadka Somaliyeed loo adeego.

Baashiir Goobe, ayaa intaas ku daray in marakan ay qabaan rajo iyo ififaalo wanaagsan.

Madaxweynaha Jamhuuriyadda Somalia, Maxamed Cabdullaahi Farmaajo ayaa dhinaca kale si qiiro leh uga hadlay taariikhda xarunta uu booqday isagoo sheegay inay tahay goobtii uu kusoo bar-baaray, wuxuuna baaq u jeediyay saraakiisha goobtan jooga oo ka codsaday inay ilgaar ah ku eegaan wiilasha agoonta ah ee ku jira xarunta lagu xannaaneeyo.

"Runtii Wiilkan waxaan ugu yeeray, waxaaa la idin ka rabaa saraakiisha maamusho xaruntan inay il gooni ah ku eegaan Carruurta agoonta ah ee ku jira halkan, waxaana xasuustaa markaan halkan joogi jirnay saraakiishii haystay qaybtood waa dhinteen ALLAHA u naxariistee waxay taaban jireen caloosheena, anaguna waxaana u sheegi jirnay sida aabayaasheen oo kale inaan baahanahay, marka waxaa la idin ka rabaa inaad wiilkan si gooni ah iigu eegtaan,"Ayuu yiri Madaxweyne Farmaajo.

Waa booqashadii ugu horaysay uu ku tago xaruntan tan iyo markii loo doortay Madaxweynaha dowladda Somalia horraantii bishan. 

GAROWEONLINE