Mareykanka oo balanqaad horleh u sameeyay Dowladda Soomaaliya
-
WARIYAHA MUQDISHO GAROWE ONLINE
- Posted On 01-01-2020, 02:10PM
MUQDISHO, Soomaaliya – Mareykanka oo shaaciyey in Soomaaliya aysan kali ku noqon doonin dagaalka ka dhanka ah Al-Shabaab ayaa balanqaadey in uu sii wadayo taageerada ku aadan ciribtirka argagixisada.
Hadalka kasoo yeeray Washington ayaa kusoo aadaya xili 28-kii December, 2019, uu ka dhacay Muqdisho qarax galaaftay in ka badan 90 ruux.
Donald Yamamoto, danjiraha Mareykanka u fadhiya Muqdisho, ayaa shaaciyey in falkaas uu soo bandhigay "cadowga dhabta ah ee Soomaaliya".
"Hadii aad tihiin dadka Soomaaliyeed, waanu idin kula garab taagan nahay dagaalka ka dhanka ah argagixisadda," ayuu hadalkiisu raaciyey.
Ururka Al-Shabaab oo qaatay mas'uuliyadda dhacdadaas ayaa qiray in dadka ugu badan ee ku naf-waayey ay badankooda ahaayeen shacab.
Cali Dheere, afhayeenka ururkaas gacansaarka la leh Al-Qaacida, ayaa tilmaamay in bartilmaameedkoodu ahaa kolanyo Turki ah.
Ugu yaraan laba kamid ah Injineerada Turkiga ee dhiseysa wadada isku xirta Muqdisho iyo Afgooye ayaa ku geeriyooday dhacdadaas.
Hay'adda Sirdoonka Soomaaliya ayaa shaacisay in qaraxaas qorsheyntiisu lahaa dalka shisheeye, isla markaana baaritaanku ku waddo.
Weerarkii Ex-kontarool Afgooye ayaa ahaa midkii ugu dambeeyay ee sanadkii 2019 ka dhacay Muqdisho, waxaana uu sidoo kale noqday midkii 3aad ee ugu dhimashadda badnaa taariikhda casriga ah ee Soomaaliya.
GAROWE ONLINE
