Mareykanka oo sharaxay saameynta horjooge Bilaal Al-Sudani

Xoghayaha difaaca ee Maraykanka, Lloyd Austin

WASHINGTON, USA - Xoghayaha gaashaandhiga ee waddanka Maraykanka, Lloyd Austin, ayaa bayaan uu soo saaray wuxuu ku soo dhaweeyay khaarijinta horjoogaha sarre ee ka tirsanaa maleyshiyaadka Daacish ee Soomaaliya.

Bilaal Al-Sudani ayaa lagu duqeeyay buuraleyda Cal Miskaad ee gobolka Bari ee maamul-goboleedka Soomaaliyeed ee Puntland. Taliska Mareykanka ee Afrika [AFRICOM] ayaa fuliyey howlgalkan.

Sida laga soo xigtey Austin, khaarijinta Al-Sudani ayaa ka dhigan "in ammaanka gobolka Geeska Afrika qeyb ahaan la isku haleyn karo isla markaana danaha Mareykanka ay hirgili karaan".

“Falkani waxa uu Maraykanka iyo saaxiibadiisa siinayaan nabad-geliyo iyo ammaan, waxaanay ka tarjumaysaa sida ay uga go’an tahay in aanu Maraykanka ka ilaalino khatarta argagixisada ee gudaha iyo dibaddaba," ayuu yiri.

Lataliyaha Amniga Qaranka Soomaaliya ayaa sheegay in howlgalka Mareykanka uu ahaa mid muhiim ah, islamarkaana uu muujinayo in Mareykanka uusan bartilmaameedsaneyn Al-Shabaab oo kaliya, balse uu sidoo kale bartilmaameedsado kooxda Daacish ee ka dagaalanta Soomaaliya.

"Fariinta ayaa ah, in hoggaamiyeyaasha dhammaan kooxaha argagixisada ah ee Soomaaliya aysan nabad geli doonin, mana jirto meel ay ku badbaadaan Gacanka Soomaaliya oo dhan," ayuu yiri Xuseen Sheekh Cali.

Al-Sudani waxaa baadigoobayay sirdoonka Maraykanka muddo sanado ah. Austin ayaa sheegay in al-Sudani uu door muhiim ah ka qaatay in uu gacan ka geysto maalgelinta howlgallada IS ee Afrika iyo sidoo kale garabka ISIS-K ee ka howlgala Afgaanistaan.

Waaxda Maaliyadda ee Mareykanka ayaa markii hore Al-Sudani waxay liiska madow ku dartey sanadka markii uu ahaa 2012-kii waqtigaas oo la aaminsan yahay in uu kasoo shaac-dhex-baxay dagaalameyaasha Al-Shabaab.

GAROWE ONLINE