Maxkamada Ciidamada oo baaritaan ka furtay weerarkii Cowsweyn

SAWIR HORE

MUQDISHO, Soomaaliya - Maxkamada ciidamada qalabka sida uu Xasan Cali Nuur Shuute gudoomiye u yahay ayaa bilaawday baaritaan ay ku sameyneyso weerarkii ka dhacay deegaanka Cowsweyne kadib hadal heyn ka dhashay oo markii dambe keenay in uu madaxweyne Xasan Sheekh ka hadlo.

Sida wararku tibaaxayaan, Gudoomiyaha ayaa dhawaan gaaray degmada Aadan Yabaal, si uu halkaasi uga bilaabo baaritaanka, qaar ka mid ah dadka ka hadlay ayaana aaminsan in tallaabadan ay muhiim u tahay soo celinta kalsoonida ay ciidamadu ku qabaan madaxda.

Madaxweynaha ayaa shirkii jaraa’id uu shalay qabtay ku xaqiijiyay in dowladda Soomaaliya ay la xisaabtami doonto cid kasta ka gaabisay mas’uuliyadeeda, sidoo kale waxa uu sheegay in ay jiraan dad taageera Al-Shabaab oo ku howlan carqaladeynta ciidamada xoogga dalka.

Siyaasiyiin mucaarad ah ayaa dhawaanahan dhaliilay qaabka uu ku socdo howlgalkii militari ee ka dhanka ah al-Shabaab, waxayna tani kusoo beegmaysaa xilli siyaasiinta ku dhow maamulka Xasan Sheekh ay ku nuuxnuuxsadeen inay jiraan koox gacan saar la leh argagaxisada.

Dhanka kale, siyaasiyiin badan ayaa ka digay in la siyaasadeyo dagaalka ka dhanka ah Al-Shabaab oo uu ugu horeeyo Xildhibaan Cabdiraxmaan Odowaa, oo sheegay in marxaladdan xasaasiga ah ay muhiim tahay in aan la tirsan dhibco siyaasadeed, wuxuuna ku baaqay in la taageero ciidamada Soomaaliya.

Madaxweynaha Soomaaliya ayaa carabka ku adkeeyay in dagaalada lagula jiro al-Shabaab la sii wadi doono iyadoo ay jiraan caqabadahaasi oo ku qotoma weeraro argagixiso iyo khilaaf gudaha ah oo ka dhashay qaabka loo maareeynayo dagaalka.

GAROWE ONLINE