Midowga Yurub oo ku baaqay in la maalgeliyo horumarka Soomaaliya

BRUSSELS, Belgium - Ra'iisul Wasaare Xasan Cali Khayre ayaa magaalada Brussels kula kulmay guddoomiyaha guddiga midawga Yurub ee Iskaashiga iyo Horumarinta Caalamiga ah, Neven Mimica.

Kulanka dhex maray Ra’iisul Wasaare Khayre iyo Neven Mimica ayaa waxaa looga hadlay xaalada guud ee dalka, gaar ahaan arrimaha dib-u-qaabeynta ee dowladdu wado.

Mimica ayaa wuxuu cod dheer ku caddeeyay in midawga Yurub ay sii wadayo taageeradiisa arrimaha dib-u-habeynta ee guulaha wanaagsan laga gaaray.

Gudoomiyaha oo sii hadlaya ayaa wuxuu sheegay in Soomaaliya ay u baahantahay maal gelin xooggan oo wax ku ool ah, si loo gaaro horumarka la hiigsanayo.

Khayre oo Faransiiska uga qayb galay shirka sanadlaha ah ee madasha nabadda Paris, ayaa magaalada Brussels ee dalka Belgium, u yimid inuu kulamo la qaato hoggaanka cusub ee Midawga Yurub.

EU-da ayaa kamid ah deeq-bixiyeyaasha ugu badan ee taakuleeya xukuumadda Muqdisho. Taageeradooda waxay daaran tahay dhanka siyaasadda, amniga, dagaalka argagixisadda iyo kobcinta dhaqalaaha.

Wasiirka koowaad ee xukuumadda federaalka ah ayaa ku booriyey daneeyayaasha caalamka in ay taageeradooda ku saleeyaan baahiyaha dhabta ah ee ka jira gudaha dalka ayna isbedel la yimaadaan.

GARAROWE ONLINE