Muddo kordhin loo sameeyay magacaabida wasiiradda Jubaland
-
WARIYAHA KISMAAYO GAROWE ONLINE
- Posted On 07-12-2019, 05:10PM
KISMAAYO, Jubaland – Baarlamaanka maamul goboleedka Jubaland ayaa maanta oo Sabti ah kulan wuxuu ku yeeshay xaruntiisa magaaladda Kismaayo.
Fadhigan oo kamid ah kuwa caadiga ah ayaa waxaa soo xaadirtay 57 mudane, sidda ay sheegtay xogheynta guud ee Aqalka Wakiiladda.
Ajendaha kulanka ayaa waxaa qayb ka ahaa ka doodista muddo kordhin loo sameynayo magacaabida Golaha Wasiiradda cusub ee maamulkaas.
Madaxtooyadda oo codsiga muddo kordhinta gudbisay ayaa qoraal ay ku dalbaneyso waxay u dirtay guddoonka xeer-dejinta.
Suldaan Cabduqaadir Xaaji Maxamuud [Luga-dheere], madaxweyne ku xigeenka labaad ee maamulkaas ayaa ku saxiixnaa warqadda.
Cabdi Baaley Xuseen, ku xigeenka labaad ee afhayeenka baarlamaanka Jubbaland, ayaa wuxuu Xildhibaanadda u akhriyey warqadda.
Dalabka muddo kordhinta ayey Madaxtooyadda u cuskatey in madaxweyne Axmed Madoobe uu "ku mashquulsan yahay arrimo ay dib-u-heshiisiin kamid tahay".
"Sidaas awgeed, waxaan codsanayaa muddo 90-casho ah si aan ugu soo dhisno xukuumad tayo iyo aqoon leh oo u adeegta bulshadda Jubaland," ayaa lagu yiri.
Ugu dambeyntii, mudaneyaasha oo cod u qaadey codsiga Madaxtooyadda ayaa ku meelmariyey cod wadar ogol ah, sidda uu ku dhawaaqay shir gudoonka.
GAROWE ONLINE
