MUQDISHU: Faah-faahin weerarka hotel Weheliye [SAWIRRO}
-
- Posted On 13-03-2017, 01:21PM
MUQDISHU, Somalia - Ugu yaraan 10 ruux ayaa la xaqiijiyay inay ku dhinteen qarax Gaari oo ka dhacay saakay iridda hore Hotel Weheliye oo ku dhaw Isgoyska Dabka ee magaalada Muqdishu.
Qaraxa oo ahaa mid aad u culus, oo jugtiisa laga maqlay qeybo kamid ah magaalada, ayaa lala eegtay Hotelkaas, oo ay degan yihiin Mas'uuliyiin iyo Xildhibaanno katirsan Baarlamaanka Somalia.
Sawirro laga soo qaadey goobta, ayaa muujinayo burbur xoog leh oo gaarey goobtaas iyo xaruumo Ganasi oo ka agdhawaa, iyadoo meydadka dadka shacabka ah ay yaallaan wadada dhexdeeda.
Ciidamada ammaanka ayaa goobta ka bilaabay howlgallo lagu baadi goobayo dadkii ka dambeeyay falkaas inkastoo aysan jirin ilaa hadda cid la qabtay oo saxaafadda loo soo bandhigay.
Waxaa jiro dad badan oo ku dhaawacmay qaraxa, kuwaasi oo qaarkood soo gaarey dhaawacyo culus, taasina laga baqayo inay kordhiso khasaaraha dhimashada weerarka.
Wuxuu ahaa weerarkii labaad oo maanta oo kaliya ka dhacay Muqdishu, iyadoo shalay qarax lagu xiray gaari uu ku dhaawacmay wariye katirsan Universal TV.
Ururka Al Shabaab ayaa sheegtay mas'uuliyada labada weerarka ee ka dhacay caasumadda Somalia.
GAROWEONLINE
