MUQDISHU: Xildhibaan Isku-day Dil ka badbaaday
-
- Posted On 29-04-2017, 12:31PM
MUQDISHU, Somalia- Xildhibaan katirsan Baarlamaanka Jamhuuriyada Federaalka Somalia ayaa xalay ka badbaaday Isku-day Dil kadib markii Gaarigiisa qarax lagula eegtay bartamaha magaalada Muqdishu.
Xildhibaan Maxamuud Abukaate iyo labo Askari oo katirsan illaaladiisa ayaa dhaawac fudud kasoo gaarey qaraxa, oo ahaa mid miino oo lagu aasay wado ku taalla meel ku dhaw Carwadii hore ee Taleex ee degmada Hodon.
Labo qof oo shacab ah ayaa sidoo kale ku dhaawacmay weerarka, oo ujeedkiisu ahaa in lagu khaarajiyo Xildhibaanka, sida uu sheegay Capt Maxamed Xuseen oo ah Sarkaal katirsan ciidamada Booliska Somalia.
Ma jirto cid sheegatay Mas'uuliyada qaraxa, balse ciidamada ayaa sameeyay baaritaano ay ku soo qabteen dhowr qof oo goobta ka agdhawaa, kuwaasi oo su'aalo lagu weydiinayo saldhiga degmada Hodon.
Dhanka kale, Koox hubaysan ayaa xalay ku diley degmada Wadajir Askari katirsanaa ciidamada amniga Somalia, kuwaasi oo sidoo kale ka qaatey Qorigiisa, kahor inta aysan goobta ka baxsan.
Al Shabaab ayaa mudooyinkii dambe kordhiyay weeraradooda Muqdishu, oo ay ku beegsanayaan Mas'uuliyiinta dowladda, Odayaasha dhaqanka, iyo Askarta katirsan Hay'adaha amniga dowladda Somalia.
GAROWEONLINE
