Muxuu ka yiri Cali Jeyte mashruuca “Hiiraan State”?
-
GAROWE ONLINE XAFIISKA MUQDISHO
- Posted On 30-10-2023, 02:07PM
BELEDWEYNE, Soomaaliya - Guddoomiyihii hore ee gobolka Hiiraan Cali Jeyte oo shir jaraa’id qabtay ayaa ka jawaabay su’aalo ay shacabku ka weydiiyeen mowqifkiisa ku aaddan xilka dowladeed ee loo magacaabay.
Cali Jeyte ayaa soo hadal qaaday maamulka "Hiiraan State" oo aysan dowladda aqoonsaneyn oo uu madaxweyne isugu magacaabay.
Waxa uu sheegay in uusan ka tanaasulin fikradda maamulka, isla markaana aysan ku koobneyn isaga oo keliya, isagoo carabka ku adkeeyay in saaxiibadiisa siyaasadeed ay sii wadi doonaan howlaha maamulka.
Sidoo kale waxa uu soo dhaweeyay magacaabista Madaxweyne Xasan Sheekh Maxamuud ee xilka u qeybsanaha Xafiiska Ciidamada Deegaanka "Macawisleyda".
Cali Jeyte ayaa la wareegay Madaxtinimada maamulkaas uu ugu magac daray Hiiraan State ka dib xil-ka-qaadis uu ku sameeyay Madaxweynaha Hirshabelle Cali Guudlaawe.
Waxaana uga sii horreeyay isku daygaas Generaal Xuud oo heshiis siyaasadeed oo la galay dowladdii hore ee Maxamed Cabdullahi Farmaajo awgiis isaga tanaasulay maamulka.
GAROWE ONLINE
