Qaar ka mid ah Mas’uuliinta lagu eedeeyay Musuqmaasuqa oo dib u helay xorriyadooda
-
GAROWE ONLINE XAFIISKA MUQDISHO
- Posted On 28-09-2023, 11:00AM
MUQDISHO, Soomaaliya - Maxkamadda Gobolka Banaadir ayaa shaacisay natiijada eedeymaha loo soo jeediyay Mas’uuliyiin ka tirsan dowladda oo ku saabsan musuqmaasuq, lunsasho hanti dadweyne.
Guddoomiyaha maxkamadda gobolka Banaadir ayaa faah faahin ka bixiyay xukunnada laga soo saaray eedeysanayaasha oo ka kala socday Wasaaradaha Maaliyadda iyo Shaqada,, Hay’adda Socdaalka iyo Jinsiyadaha iyo Bangiga Dhexe
Maxkamada ayaa 6 Eedeysane oo lagu soo eedeeyay Musuq maasuq ku xukuntay Xabsi u dhaxeeya Hal sano ilaa Sagaal sano,halka 5 ka mid ah Eedeysanayaasha lagu waayay wax dambi ah.
Eeddeysanayaasha dib loogu soo celiyay xorriyadooda ayaa kala ah:
1- Aadan Maxamed Cabdi: maamulaha qaadashada Visaha ee waaxda Viso kordhinta Hay’adda Socdaalka iyo Jinsiyadda.
2- Cabdiwaaxid Mursal Ibraahim: shaqaale ka tirsan qaybta ruqsad siinta ajaaniibta waaxda sharciga ee wasaaradda shaqada iyo arrimaha bulshada .
3- Cabdullahi Maxamed Cali: agaasimihii hore ee wasaaradda shaqada iyo arrimaha bulshada
4- Maxamed Cadde Mukhtaar Cabdiraxmaan: agaasimihii hore ee wasaaradda shaqada iyo arrimaha bulshada.
5- Cabduqaadir Cabdi Socdaal oo isna ahaa qasnjiga qaybta dakhliyada ajaaniibta ee Bankiga Dhexe, laantiisa garoonka Aadan Cadde.
Xildhibaan C/raxmaan Odowaa oo ka tirsan golaha Shacabka, ayaa ka hadlay natiijada ka soo baxday Maxkamadda, isagoo dalbaday in dadka dambiyada lagu waayay lagu soo celiyo xilalka ay hayeen.
La dagaalanka Musuqmaasuqa ayaa qeyb ka ah barnaamijka Xukuumadda Dan Qaran iyada oo loo xiray shaqsiyaad badan oo jagooyin ka hayay hay’adaha kala duwan ee dowladda walina sii socda baaritaano uu sameynayo xafiiska Hantidhowrka.
GAROWE ONLINE
