Qarax khasaare geystay oo ka dhacay Gobolka Hiiraan

BUULABURDE, Soomaaliya - Warar dheeraad ah ayaa naga soo gaaraya Qarax ismiidaamin ah oo maanta ka dhacay degmada Buulaburde ee gobolka Hiiraan, qaraxan xoogan ayaa ka dhacay suuqa kawaanka ee degmada, waxuuna geystay Khasaare nafeed iyo mid hantiyeed.

Ilo dadka deegaanka ah ayaa sheegaya in tirada dhimashada ay gaarayso ilaa 5 ruux oo laba ka mid ah ay ka tirsanaayeen ciidamada amaanka, halka qaraxa uu geystay burbur xoogan kaas oo soo gaaray dhismayaasha ku yaala aagaas.

Wararka naga soo gaaraya dadka deeganaka ayaa tibaaxaya in jugta qaraxa laga malqay inta badan ee xaafadaha degmada, waxaana isla markii goobta tagay ciidaamo ka tirasan dowladda federaalka iyo maamulka gobolka si ay howlagallo uga fuliyaan degmada.

Dadka deegaanka ayaa sidoo kale gurmad u fidiyay dhaawacyadii ku waxyeeloobay qaraxan, iyada oo aan ilaha dowladda ilaa haatan shaacin tirada saxda ah ee dadka ku dhaawacmay amase ku dhintay.

GAROWE ONLINE