Ra'iisul wasaare Xamza Cabdi Barre oo rajo galiyay Soomaalida Minnesota

USA - Ra'iisul Wasaare Xamza Cabdi Barre oo khudbad dhinacyo badan taabanaysa ka jeediyay gobolka Minnesota ee dalka Mareykanka kadib markii uu kasoo qeybgalay Shirka 78aad ee UN-ka ee ka dhacay New York.

Xamza ayaa xaalada dalka uga warbixiyay jaaliyadda ugu badan ee Soomaalida ah ee ku nool Mareykanka oo ka qeybgalay xafladii xalay loogu qabtay Minneapolis.

RW Xamza ayaa carabka ku dhuftay guulaha ay dowladdu ka gaartay la dagaallanka Al-Shabaab, la dagaallanka musuqmaasuqa, horumarinta dib u habeynta maaliyadda, horumarinta bulshada, horumarinta amniga iyo horumarka laga gaaray hannaanka deyn cafinta.

"Soomaaliya hadda waxay leedahay dowlad xasiloon," ayuu Barre u sheegay dad gaaraya 1,600 oo isugu soo baxay Hotel DoubleTree ee Bloomington.

"Haddii aan la helin dowlad xasiloon, kama shaqeyn karno hagaajinta arrimaha amniga iyo caqabadaha kale ee uu dalku wajahayo."

Isagoo ku nuux-nuux saday baahida loo qabo in la taageero, ayuu Ra’iisul Wasaaruhu ugu baaqay Soomaalida Mareykanka ah inay ku taageeraan dowladda iyo shacabkeeda dagaalka socda ee dalka looga xoreynayo gacanta kooxda argagixisada ah ee Al-Shabaab.

GAROWE ONLINE