Somalia: 32 qof oo ku dhimatay Biyo Sumaysan oo ay cabeen
-
- Posted On 30-01-2017, 06:29PM
BAYDHOBO, Somalia- Ugu yaraan 32 qof oo shacab ah ayaa ku geeriyootay Biyo ay ka cabeen Ceel la sumeeyay, oo ku yaalla deegaanka Masuubiyow ee duleedka magaalada Baydhabo ee xarunta gobolka Baay.
Deegaankaas oo 20KM u jira Baydhabo ayaa waxaa ku noolyihiin dadweyne isugu jira xoolo dhaqato iyo beeralay.
Mas'uuliyiin katirsan maamulka Koonfur Galbeed ayaa tagey deegaanka Masuubiyow, waxaana ay sheegeen in dad gaaraya 20 qof ay la xanuunsan yihiin Biyaha sumaysan ee ay ka cabeen Ceelka.
Waxay uga digeen dadka deegaanka inay cabbaan biyahaas inta laga sifaynayo iyagoo xusay inay dhawaan keeni doonaan adeegyo caafimaad oo kala duwan.
Wasaarada Caafimaadka Koonfur Galbeed ayaa sheegtay in Qaar kamid ah dadka biyaha cabey ay xaaladoodu aad u liidato loona qaadey Isbitaallada magaalada Baydhobo, si noloshooda loo badbaadiyo.
Hooyo lagu magacaabo Amran Maxa'ed ayaa sheegtay inay labo caruur ah, oo ay dhashay kamid yihiin dadka u dhintay Biyaha ay ka cabeen Ceelka la sumeeyay.
Al shabaab oo dhawaan laga saarey Deegaanka Masuubiyow oo ku yaalla inta u dhaxayso Baydhobo iyo Deynuunay ayaa loo malaynayaa inay sumeeyeen Ceelka si ay ugu dilaan Askarta maamulka Koonfur Galbeed.
GAROWEONLINE
