Somalia: Qarax ka dhacay gobolka Baay
-
- Posted On 04-03-2017, 11:22AM
BUURHAKABO, Somalia - Qarax xooggan ayaa kolonyo ay la socdeen ciidamada Eithiopia ee qeybta ka ah AMISOM waxaa lagu eegtay inta u dhaxayso Buurhakabo iyo Baydhobo, oo katirsan gobolka Baay.
Goob jooge ayaa Warsidaha Garowe Online u xaqiijiyay in Qaraxa uu ahaa miino lagu aasay wado ku taallo deegaanka Mooda-moode, taasi oo isku xirta degmooyinka Baydhabo iyo Buurhakabo.
Kolonyada AMISOM oo sahay military u wadeen ciidamo ku sugan saldhigyada ku yaallo degmada Buurhakabo, ayaa la sheegay in khasaaro uu kaso gaarey qaraxa miino, ee lagula eegtay Mooda-moode.
Al shabaab ee xiriirka la leh Al Qaacida ayaa sheegtay in weerarka miino ay ku dileen saddex Askari oo katirsanaa AMISOM, sida lagu baahiyay baraha Internet-ka ee taageera Kooxda.
Ma jirto illo madaxbanaan oo xaqiijisay khasaaraha qaraxa saakay ka dhacay deegaanka Mooda-moode.
AMISOM iyo Saraakiisha maamulka gobolka Baay walii wax fahfaahin ah kama aysan bixin weerarka.
GAROWEONLINE
