Soomaaliya oo midnimo u muujisay Turkiga kadib weerarkii Istanbul

Ugu yaraan shan qof ayaa ku dhimatay, in ka badan 50 kalana way ku dhaawacmeen qaraxan.

MUQDISHO, Soomaaliya - Madaxda dowladda federaalka Soomaaliya ayaa midnimo u muujiyey Turkiga kadib qarax sababay dhimasho iyo dhaawac oo ka dhacay fagaare ku yaala magaalada Istanbul.

Madaxwayne Xasan Sheekh oo qoraal ku daabacay ciwaankiisa gaarka ah ee Twitter-ka ayaa tacsi u diray dhamaan eheladda iyo asxaabta dadka ku naf-waayay "weerarkan argagixiso".

"Shacabka iyo dowladda Turkiga waa xulafo muhiim u ah Soomaaliya waxaana ay kaalin ku leeyihiin horumarka iyo amniga [dalkeenna]," ayuu kusoo koobay qoraalka ciwaankiisa Twitter-ka.

Dhankiisa, ra’iisul wasaare Xamse Cabdi Barre ayaa si xooggan u cambaareeyay weerarka argagixiso ee fulaynimada ah ee lagu qaaday maanta dad rayid ah oo ku nool magaalada Istanbul.

Xamse oo sheegay in uu uga tacsiyeynayo shacabka iyo dowladda Türkiye, dadka ku dhintay weerarka ayaa xusay in Soomaaliya ay la murugooneyso, isla markaana ay u duceyneyso dadka wax ku noqday weerarkaasi arxan darrada leh.

"Argagaxisada, nooc kasta oo ay tahay, waa laga adkaan doonaa," ayuu kusoo gabagabeeyay qoraal kooban oo uu ku daabacay ciwaankiisa gaarka ah ee mareega Twitter-ka.

Ugu yaraan shan qof ayaa ku dhimatay, in ka badan 50 kalana way ku dhaawacmeen weerarkan oo Turkiga uu ku eedeeyay kooxda PKK, urur ay dowladaha Yurub iyo Mareykanka u aqoonsan yihiin "argagixiso".

GAROWE ONLINE